छायाँ सेन्टरमा भएको घटना बारे मन्त्री श्रेष्ठको यस्तो प्रष्टोक्ती

संस्कृति, पर्यटन तथा नागरिक उड्डयन मन्त्री जीवनराम श्रेष्ठले ठमेलस्थित छायाँ सेन्टरमा भएको घटनाको सत्यतथ्य बुझेर मात्र प्रतिक्रिया दिन सर्वसाधरणलाई आग्रह गरेका छन् ।

मन्त्री लाइनमा नबसेको उल्टै लाइनमा बस्न आग्रह गर्ने सुरक्षागार्डलाई पक्राउ गरेको भन्दै मन्त्री श्रेष्ठको सामाजिक संजालमा आलोचना भएको थियो । सर्वसाधरणले मन्त्री श्रेष्ठमाथि आलोचना गर्न थालेपछि मन्त्री श्रेष्ठले घटनाबारे सत्य तथ्य बुझेर मात्र प्रतिकृया दिन आग्रह गरेका हुन् ।

उनले सामाजिक संजाल फेसबुकमार्फत सबै नेता र मन्त्री खराब हुन् भन्ने भाष्य निर्माण गर्ने षडयन्त्रप्रति चनाखो हुन आग्रह गरे । उनले सर्वसाधरणको प्रतिक्रिया स्वाभाविक भएको भन्दै त्यो घटना लाइनमा नबसेर भएको नभई मन्त्री श्रेष्ठ र र उनको सेक्युरिटीमाथि दुर्व्यवहार गरिएकोले सेक्युरिटीले आफ्नो निकायमा जानकारी गराएको प्रष्टीकरण दिएका छन् ।

उनले फेसबुकमा लेखेका छन्,‘छाँया सेन्टरमा भएको घटनाबारे पब्लिकबाट आएका प्रतिकृयामा मेरो गम्भीर ध्यानाकर्षण भएको छ । पब्लिकको प्रतिकृया स्वभाविक छ, तर त्यो घटना लाइनमा नबसेर भएको नभई म र मेरो सेक्युरिटीमाथि दुर्व्यवहार गरिएकोले सेक्युरिटीले आफ्नो निकायमा जानकारी गराएको हो । घटनाबारे सत्य तथ्य बुझेर मात्र प्रतिकृया दिन र सवै नेता र मन्त्री खराव हुन् भन्ने भाष्य निर्माण गर्ने षडयन्त्रप्रति चनाखो हुन आग्रह गर्दछु ।’

मन्त्री श्रेष्ठलाई ‘मन्त्रिसन्त्री’ चिन्दिन भन्दै दुरव्यवहार गर्ने एक सुरक्षागार्ड पक्राउ परेका थिए । शुक्रबार ठमेलस्थित छायाँ सेन्टरमा भिसा आवेदनका लागि बायो मेट्रिक दिन पुगेका मन्त्री श्रेष्ठलाई सुरक्षागार्डले दुरव्यवहार गरेका थिए ।

मन्त्रीलाई अभद्र व्यवहार गरेको आरोपमा प्रहरीले उनलाई पक्राउ गरेर ५ दिनको म्याद थप गरेको छ । सेक्युरिटी गार्डलाई पक्राउ गरेपछि मन्त्री श्रेष्ठलाई सामाजिक संजालमा मिश्रित प्रतिक्रिया आइरहेको छ ।