भोटेकोशी नदीको बाढीले १५ घर बगायो, १९ भन्दा बढी सम्पर्क बाहिर

सिन्धुपाल्चोक – भोटेकोशी नदीको बाढीले १५ घर बगाएको छ भने १९ भन्दा बढी सम्पर्क बाहिर छन् । बाह्रबिसे नगरपालिकाको जम्बु भन्ने ठाउँमा बाढीले घर बगाएकाे हाे । साे स्थानमा केही मान्छे वेपत्ता समेत भएका छन् ।

स्थानीय अनन्तप्रकाश श्रेष्ठका अनुसार बाह्रबिसेको गाती बजार बगाएको छ। टेलिफोन सम्पर्कमा उनले भने, गातीका १४ घरका १९ जना हराइरहेको र दुई जनाको शव फेला परेको छ । बाढीमा हराइरहेकाहरुको खोजी कार्य भैरहेको उनले जानकारी दिए ।

इलाका प्रहरी कार्यालय बाह्बिसेका प्रहरी निरीक्षक नवराज न्यौपानेले प्रहरी, नेपाली सेना र स्थानीयले बेपत्ता भएकाहरुको खोजी कार्य गरिरहेको जानकारी दिए । उनका अनुसार सो नगरपालिकाको जम्बुमा रहेको एल्मो ठाडो खोलामा राती ११:३० बजेबाट बाढी आउदाँ उक्त क्षति भएको हो ।

बाढीले बगाएका २० बर्षीय निकेश बस्नेत र उनको तीन बर्षीयाा छोरीको शव निकालिएको छ । अरु बेपत्ताको तीव्र खोजी भईरहेको छ । बिस्तृत बिबरण आउन बाँकी रहेको निरीक्षक न्यौपानेले बताए ।

प्रहरीका अनुसार रातभर परेको बर्षाले तातोपानी स्थित चाकु बजार नजिकै रहेको झ्यालेखोला सडक बगाएको छ । बाह्बिसे नगरको जलेटार आर्मी ब्यारेकमूनिको सडक पनि बाढीले बगाएको छ । लामोसाँघुमा भखरै लगाएको प्लम्ब ढलान पनि बगाएको छ । जुरे पहिरोमा सडक बगाउदाँ सडक सम्बन्ध टुटेको छ ।

अहिले सभामुख अग्नीप्रसाद सापकोटासहितको टोली हेलिकोप्टरवाट सिन्धुपाल्चोक जाने तयारी रहेको सभामुख प्रेस सल्लाहकार श्रीधर न्यौपानेले जानकारी दिए ।