अन्जना ताम्राकारको ‘लुमन्तिया न्हाय्कं’ सार्वजनिक

नेपालभाषाका कवयित्री तथा उपन्यासकार अन्जना ताम्राकारको कविता सङ्ग्रह लुमन्तिया न्हाय्कं (सम्झनाको ऐना) एक समारोहका बिच विमोचन गरिएको छ । उक्त विमोचन कार्यक्रममा प्रमुख अतिथि वरिष्ठ उपन्यासकार मल्ल के सुन्दर र अतिथिमा गीतकार एस.पी. कोइराला, कवि पुष्पराज राजकर्णिकार, गायिका अन्जान शाक्य र पूर्व गर्भनर दिपेन्द्र पुरुष ढकालले संयुक्त रुपमा विमोचन गरे । यसै बीच वरिष्ठ हास्य कलाकार मदनकृष्ण श्रेष्ठले गायक स्व. रमेश ताम्राकारलाई सम्झदै उनको बारेमा लेखिएका अधिकांश कविता मर्मस्पर्शी रहेको बताए ।

वरिष्ठ गायक स्व रमेश ताम्राकारको तस्विर अगाडि दियो बाली मुख्य अतिथि मल के सुन्दरले कार्यक्रमको शुभारम्भ गरे । विमोचनपछि बोल्दै प्रमुख अतिथि मल्ल के सुन्दरले कविताहरुमा प्रयुक्त विम्ब र प्रतीकहरु प्रभावकारी रहेको बताउँदै सांस्कृतिक विषयलाई पनि कवितामा केही ठाउँमा उठाइएको बताए ।

हरप्रहरसंग कुरा गर्दै अन्जना ताम्राकारले शोक र वियोगको पीडालाई आफूले साहित्यमा लगाएको बताइन् । साहित्यकार धुर्व मधिकर्मीको सभापतित्वमा भएको सो कार्यक्रममा पूर्व गर्भनर दिपेन्द्र पुरुष ढकाल, कवि पुष्पराज राजकर्णिकार, गायिका अन्जान शाक्य र विमला मानन्धरले पनि मन्तब्य राखेका थिए । सिर्जना अभियान प्रकाशक रहेको लुमन्तिया न्हाय्कं कवितासङ्ग्रहमा पीडा, वियोग, प्रेम, आत्मीय सम्बन्ध र संस्कृति विषयका ६६ वटा कविताहरु संग्रहित छन् ।