राष्ट्रभावले ओतप्रोत ‘उठ नेपाली ,जुट नेपाली’ राष्ट्रिय गीत सार्वजनिक हुँदै

सञ्चारकर्मी, कवि तथा साहित्यकारको परिचयबाट स्थापित सुशीला ढकाल अधिकारी अब गीतकारका रुपमा समेत चिनिन थालेकी छिन् । उनले राष्ट्रको सम्मान स्वरूप कोरेका गीत वरिष्ठ गायक तथा सङ्गीतकार शिशिर योगीले स्वर भरेका छन् ।

देशको वर्तमान अवस्थालाई झल्काउने राष्ट्रभावको जागरण गीत ‘उठ नेपाली , जुट नेपाली’ योगीकै स्वर तथा सङ्गीतमा आगामी माघ १६ गतेको विशेष दिन पारेर अधिकारीको आफ्नै युबटुब च्यानल मार्फत सार्वजनिक हुन लागेको छ ।

अधिकारीको आफ्नै युटुव च्यानल (सिर्जनाको चौतारी) मार्फत उक्त गीत भिडियो सहित रिलिज गरिन लागेको हो । युटुव च्यानल मार्फत सार्वजनिक भएको केही घण्टामै उक्त भिडियाे सहितको राष्ट्रिय गीतले धेरैको मन जितिसक्ने अनुमान गरिएको छ । मनोहर सुनामले सङ्गीत संयोजन गरेको उक्त गीत दील समर्पणले रेकर्ड गरेका हुन् । प्रकाश मिश्रको मिक्सिङ रहेको सो गीतको दृष्याङ्कन भने बिरेन्द्र भाट विपिनले गरेका छन् । एकौस्टिक नेपालमा रेकर्डिङ भएको सो गीतको पोस्ट प्रोडक्सन वल्र्ड कभर मिडियाले गरेको हो ।

चर्चित गायक योगीले उक्त शव्दको भावले आफ्नो मन छोएकाले सो गीत आफूले गाएको प्रतिक्रिया दिए । गीतकार अधिकारीले भने आफूले नेपालीहरुलाई एकताको सन्देश सहित फुटेर होइन जुटेर अघि बढ्न र राष्ट्रियताप्रति गम्भिर बन्न आग्रह गर्ने उदेश्यले उक्त गीत लेखेको जानकारी दिइन् ।