तानसेन नगरपालिकाले दियो ३६ युवा उद्यमीलाई १ करोड १२ लाख रुपैया

पाल्पा – तानसेन नगरपालिकाले ३६ युवा उद्यमीलाई १ करोड १२ लाख रुपैया सहुलियत ब्याजदरमा ऋण उपलब्ध गराएको छ । नगरपालिकाले पालिका भित्रका महिला, दलित, पिछडिएका वर्ग र वैदेशिक रोजगारबाट फर्किएकाहरुलाई सहुलियत दरमा ऋण उपलब्ध गराएको हो ।

युवा उद्यमशीलता कार्यक्रम अन्तर्गत नगरपालिकाले सहुलियत दरमा ऋण उपलब्ध गराउने क्रमको यो पहिलो चरण हो । नेपाल बैँक, ग्लोबल आइएमइ बैँक र मुक्तिनाथ विकाश बैँकसँगको साझेदारी रहेकोमा पहिलो चरणमा भने ग्लोबल आइएमइ बैँकको सहयोगमा सहुलियत ब्याजदरमा ऋण उपलब्ध गराइएको हो ।

युवा उद्यमीको लागि सहुलियतपूर्ण कर्जाको रकम हस्तान्तरण कार्यक्रममा बोल्दै नगरपालिका प्रमुख अशोक कुमार शाहीले सम्पूर्ण नगरबासीलाई समृद्घ र खुसी नागरिक बनाउने सोचसहित प्रयत्नशिल रहेको बताए । नगरपालिकाले उपलब्ध गराएको सहुलियतपूर्ण ऋणको सहि सदुपयोग गर्न पनि प्रमुख शाहीले अनुरोध गरे ।

उद्यमको स्वरुप र आवश्यक पुँजीको आधारमा अधिकतम १५ लाख रुपैयासम्म सहुलियत ब्याजदरमा नगरपालिकाले ऋण उपलब्ध गराउन सुरुवात गरेको छ ।