भर्खरै सम्पन्न पिच बाटो भत्काएर गरे ललितपुरका वडाध्यक्षले कामको सुरुवात

स्थानीय निकाय निर्वाचनको मतपरिणाम अधिकांस स्थानको आइसकेको छ भने केही ठाँउमा मतगणना जारी छ । निर्वाचित जनप्रतिनिधिले आफ्नो पदभार ग्रहणसँगै विभिन्न जनमुखी कामको घोषणा गरेका छन् भने कतिले कामको सुरुवातसमेत गरिसकेका छन् ।

ललितपुर महानगर वडा १५ का नव निर्वाचित वडाध्यक्ष सुरेश शाहीले भने आफ्नो कार्यकालको सुरुवात भर्खर सम्पन्न कालोपत्रे बाटो भत्काएर गरेका छन् ।

अघिल्लो स्थानीय निकायको चुनावमा नेकपा माओवादीबाट वडाध्यक्षमा पराजित शाही हाल नेकपा एमालेबाट वडाध्यक्षमा निर्वाचित भएका हुन् ।

निवर्तमान वडाध्यक्ष सुदर्शन मिश्रले आफ्नो फेशबुकमा बाटो खन्दै गरेको फोटोसहित दुख व्यक्त गरेका छन् । नवनिर्वाचित जनप्रतिनिधिको आडमा आफ्नो कार्यकर्ताको संरक्षण गर्दै खुमल हाईटमा भर्खर मात्र गरेको पिच सडक भत्काउदै गरेको अवस्था भन्दै मिश्रले दुख व्यक्त गरेका छन् ।