‘मन्त्र’ को ट्रेलर सार्वजनिक, चलचित्र वैशाख १६ बाट प्रदर्शन हुने

खिल बहादुर तामाङको निर्देशनमा तयार भएको चलचित्र ‘मन्त्र’को ट्रेलर सार्वजनिक भएको छ । यस चलचित्रमा अभिनेता सौगात मल्ल र अभिनेत्री दीया पुनको बेजोड अभिनय साथै नेपालको हिमाली क्षेत्रको भेषभुषा र लवज हेर्न पाइन्छ ।चलचित्रमा बुद्दि तामाङ, नमिता घिसिङ्ग, बिर बहादुर लामा, पासाङ्ग टि शेर्पालगायतका कलाकारहरुको पनि अभिनय रहेको छ ।चलचित्रमा परिक्षेद सेनको कथा, साम्तेन भुटिया, सुनिल निहुरे र सेन स्वयंको पटकथा, सन्तोष सुनारको संगीत, सञ्जय लामाको छायांकन रहेको छ ।

ट्रेलर रिलिज कार्यक्रममा अभिनेता मल्लले चलचित्र छायांकनको समयमा निकै गाह्रो भएपनि चलचित्र राम्रो बनेको बताए । आफुले चलचित्रको लागि घोडचढी सिकेको बताए । गोर्खा सिरानचोक एण्ड लिगलिग कोट फिल्मस् प्रा. लि. को ब्यानरमा डिभाइन इन्टरटेन्टमेन्ट र डि. एस प्रोडक्सनको सहकार्यमा चलचित्र निर्माण भएको हो ।

यस चलचित्र खिल बहादुर तामाङको निर्देशनमा तयार भएको छ । आउँदो बैशाख १६ गतेबाट प्रदर्शनमा आउन लागेको चलचित्रको छायांकन ५१०० मिटरभन्दा माथिको उचाइँमा रहेको मनास्लु हिमालको बेसक्याम्प क्षेत्रमा गरिएको बताइएको छ ।